RC EVOLUTION - 遙控工房 - 香港RC遙控車討論區

 找回密碼
 新玩家註冊
搜索
查看: 3122|回復: 17
收起左側

[技術分享] 中置唔中置?

  [複製鏈接]
 樓主| AMAT 發表於 2019-9-20 02:32:06 | 顯示全部樓層 |閱讀模式

遊客登錄

您需要 登錄 才可以下載或查看,沒有帳號?新玩家註冊

x
70440869_2415909611978701_3309111369143418880_n.jpg


相信呢排玩車最hot嘅話題,應該係買唔買中置kit嚟改。唔少牌子嘅車都推出咗中置kit,例如第一間先行嘅Zero Tribe出俾Xray,之後Arrowmax出俾Xray同Yokomo用嘅kit,仲有Xpress XQ1系用嘅中置,3Racing成架中置車架,甚至係AE TC7.2都出咗。




其實可能唔係好多人知,當初Zero Tribe出俾Xray,係因為國外好多人仲係玩緊舊款Xray,而Xray某程度上有一定共通性,所以出果套kit係由T4 17至19都用得,變相將舊車翻新又玩得。呢一下其實係好大市場。唔好講Xray,外國好多人仲玩緊415嚟鬥車,只要有Parts出一日,佢地都會繼續玩。




但除咗呢個問題,究竟換中置有冇著數呢?尤其是唔少牌子都賣到成千銀,真係就嚟買多架車。或者我從我地工房自己開發417中置測試嘅感覺分析下。




中置其實唔係咩新鮮事,田宮TA05就出過,原因係俾中階玩家有一架容易操控嘅車。一則重心接近中間,二則因為尾皮帶較長,摩打出嚟嘅力亦較柔和。所以中置相比起一般touring設計,係灣會較圓但唔係推,但直路加速就會較差。但TA05後,去到TA07先返嚟,唔計田宮盃,但又冇人攞嚟出比賽車。其實上文都講出咗原因,直路加速唔夠快。所以你唔見Xray或Yokomo出一架中置比賽版本。




但點解宜家又會有人出kit,除咗賺大家錢,亦因為宜家嘅電子設備越嚟越快,摩打亦越嚟越高速,係電子上嘅優點,例如可以較turbo,某程度上抵消咗中置尾皮帶係加速開turbo果一下嘅突然性,令效果更柔順易掌控,又可以享受到佢係灣時圓滑嘅轉向感,所以越嚟越多人用。




不過,如果假設係同一款車,係一模一樣電子設備同setting下,你會發覺中置係會慢過正常設計嘅小小,但平均值又會係中置好啲。所以兩者各有優點。




所以變相宜家唔少人,包括我自己,都會一架正常一架中置落場,同一條呔各試一轉,咁就會知掌日setting邊個較佳用邊架。而我地自己測試正常設計同中置下,同一套呔,尤其係尾呔,中置相比較係會耐啲overheat,而係場地traction不足時,又或者呔唔咬,中置都會寬容度大啲,會易掌握啲。如果場地多灣,如呢排嘅PYC setting,大量髮夾,中置會好走啲。但如果係早前大量高速直路可full雞開turbo嘅,就正常後置設計會有較佳時間。其實有啲似早排玩SSBB定正常油壓,都係同場地大小,灣路設計有關係。亦都因為咁,你唔會見Xray或Yokomo自己出一架中置,因為世界賽啲比賽場地,多數都係大場嚟,直路長,灣又多高速灣,出一架中置嚟俾車手嚟比賽,似乎唔係太過合適。反而係亞洲地區一啲場地,好似香港啲場地咁,比較係多灣,咁就比較合適。當然,我地唔排除有日佢地會出一架中置嚟賣,始終係有市場,等同FWD本來得日本仔亞洲地區玩,Xray都出一架出嚟一樣。




現實問題,買唔買?有錢就當然買啦,玩車唔試過邊心息。不過我都會話睇你去邊玩。如果你係入PYC或TRC嘅,換係會好啲啦,但都要睇場layout。但如果你係玩佐敦谷嘅,我覺得就唔好晒錢,盞覺得慢。另外亦要睇你用咩摩打,如果係玩開快摩打,開turbo,咁可以試下佢反應有咩差別,但如果係玩17.5嘅,又唔係開turbo,就唔好晒錢,你會覺得架車好推唔識轉灣。




不過如果可以出啲唔好下下成千嘅conversion kit,可能大家會樂於去買。


d.s 發表於 2019-9-20 10:21:58 | 顯示全部樓層
認同版主文中所指
中置後置各有優勢

不過何解突然流行出中置kit?
是否因為近年最先出中置kit比自己嘅品牌Awesomatix所影響 ?
sean2013 發表於 2019-9-20 10:43:56 | 顯示全部樓層
無野揾野改,改一改又扮創新,只係風氣,驚執輸
其實生意手法,揾錢技倆
係世界冠軍唔中置都贏
rk2 發表於 2019-9-20 10:52:36 | 顯示全部樓層
遲多 一/兩年,會由中置改為傾前 ?
ICY 發表於 2019-9-20 11:36:53 | 顯示全部樓層
sean2013 發表於 2019-9-20 10:43
無野揾野改,改一改又扮創新,只係風氣,驚執輸
其實生意手法,揾錢技倆
係世界冠軍唔中置都贏

師兄你真係講出哂我心聲
d人都唔明,係勁有技術有知識既,渣乜都放你星,唔識玩既,買乜新車新產品都玩到pat屎咁架啦
係本地搵幾個贏到幾隻飛機杯既大茄打d分享文氹人落答,真係傻既先盅個頭埋去比佢呃

 樓主| AMAT 發表於 2019-9-20 11:57:24 | 顯示全部樓層
d.s 發表於 2019-9-20 10:21
認同版主文中所指
中置後置各有優勢

個人意見係,先作為一個GIMMICK,但後來發覺有優勢,所以個個都出。

 樓主| AMAT 發表於 2019-9-20 11:58:08 | 顯示全部樓層
rk2 發表於 2019-9-20 10:52
遲多 一/兩年,會由中置改為傾前 ?

其實都睇當時唧技術發展,例如摩打,電池重量等等。
sean2013 發表於 2019-9-20 12:47:45 | 顯示全部樓層
ICY 發表於 2019-9-20 11:36
師兄你真係講出哂我心聲
d人都唔明,係勁有技術有知識既,渣乜都放你星,唔識玩既,買乜新車新產品都玩到 ...

年年都要揾D野扮改良, 唔改又俾人覺得唔創新,落後
有少少改動D人就一鍋蜂追求
睇下420未又係咁,使鬼中置,
根本黎黎去去就係䇔車果幾個人
佢地玩乜都䇔㗎啦,唔中置唔代表會輸
一句講晒 .....多_余



 樓主| AMAT 發表於 2019-9-20 14:54:15 | 顯示全部樓層
中置與否,同贏車與否冇直接關係。

但係一架中置同唔係中置,揸出嚟感覺係兩種完全同特性,對於唔同人手勢嚟講,中置會較容易掌握。
呢個係特性上事實,唔係改小小感覺唔到分別。

要陰謀論覺得係呃人錢,咁其實不如唔好玩遙控車,遙控車本來就係非必須品,本來就係呃錢。

dttmtong 發表於 2019-9-20 17:27:54 來自手機 | 顯示全部樓層
其實自己都可以試到有乜分別,點可以話呃呢?
dttmtong 發表於 2019-9-20 17:31:00 來自手機 | 顯示全部樓層
玩相機丶玩單車丶玩 Hi Fi, 玩好多野都係咁,少少的分別可能要俾多幾倍的價錢。比賽就係追求個 0.1 秒的差別,有要求嘅咪買貴啲,無要求嘅去返斗城買部 ready to run
 樓主| AMAT 發表於 2019-9-20 20:12:45 | 顯示全部樓層
dttmtong 發表於 2019-9-20 17:27
其實自己都可以試到有乜分別,點可以話呃呢?

遙控車呢啲比例細,速度大嘅玩意,其實只要差小小,就可以差好遠。

最簡單一個例子,個搖桿多1MM戒子墊一墊高,感覺已經有分別。
油壓高一格或低一格,已經有分別。可能本來唔夠轉變成夠,可能本來好快OVERHEAT條呔,之後就冇.......

個摩打由近尾改成近中間,其實已經分別好大。仲有尾皮帶長度出嚟果下力.....

差小小就已經可以差好遠。
hing830 發表於 2019-9-20 21:32:12 | 顯示全部樓層
AMAT 發表於 2019-9-20 20:12
遙控車呢啲比例細,速度大嘅玩意,其實只要差小小,就可以差好遠。

最簡單一個例子,個搖桿多1MM戒子墊 ...

師兄請問如果同一樣設備,油壓裝法企D,同斜D,邊種入入灣同灣中好D.
 樓主| AMAT 發表於 2019-9-21 11:23:54 | 顯示全部樓層
hing830 發表於 2019-9-20 21:32
師兄請問如果同一樣設備,油壓裝法企D,同斜D,邊種入入灣同灣中好D.

要睇架車特性先答到。
要睇下架車係頭轉定尾轉。

企啲係ROLL入去,斜啲係掟入去。入灣計。

以我自己嘅SETTING,正常放置我係尾企啲,中置我係尾斜啲。
因為正常放置反應快啲,我要佢尾唔好咁掟入去,灣中唔好甩。中置入灣反應唔夠快,我要佢尾斜啲掟佢入去,而佢中灣定特性幫我定住唔會甩。



hing830 發表於 2019-9-21 12:55:02 | 顯示全部樓層
AMAT 發表於 2019-9-21 11:23
要睇架車特性先答到。
要睇下架車係頭轉定尾轉。

謝謝解答
1BM 發表於 2019-9-29 17:43:12 | 顯示全部樓層
sean2013 發表於 2019-9-20 10:43
無野揾野改,改一改又扮創新,只係風氣,驚執輸
其實生意手法,揾錢技倆
係世界冠軍唔中置都贏

絕對同意
Toby144 發表於 2019-11-21 13:03:20 來自手機 | 顯示全部樓層
AMAT 發表於 2019-9-20 14:54
中置與否,同贏車與否冇直接關係。

但係一架中置同唔係中置,揸出嚟感覺係兩種完全同特性,對於唔同人手勢 ...

講得好好和直接...i like...!
唔同人有唔同愛好車種...!
同意Rc 非必須品...!
wingscreamer 發表於 6 天前 | 顯示全部樓層
Good.....
您需要登錄後才可以回帖 登錄 | 新玩家註冊

本版積分規則

手機版|小黑屋|RC EVOLUTION - 遙控工房

GMT+8, 2019-12-7 16:27 , Processed in 0.052118 second(s), 18 queries , Gzip On.

Powered by Discuz! X3.2

JKNET CDN | © 2001-2013 Comsenz Inc.

快速回復 返回頂部 返回列表