RC EVOLUTION - 遙控工房 - 香港RC遙控車討論區

標題: SERVO不同MODE速度問題 [打印本頁]

作者: AMAT 時間: 2022-2-15 09:32
標題: SERVO不同MODE速度問題
睇到有討論區嘅車友，問加快SERVO速度問題。

有啲車友可能對無論FLYSKY嘅SR/SFR，Futaba嘅SR，又或者Sanwa嘅SSR/SUR有個誤解，以為開咗呢啲MODE，隻SERVO行快咗。其實所謂嘅快並唔係隻SERVO行快咗，只係個SERVO反應快咗。

首先要知道，每隻SERVO都有一個SPEC，舉例一隻SERVO佢個SPEC寫，6V行0.07秒/60度，7.4V行0.06秒/60度，咁佢個速度係咁多就係咁多。你可以選擇BEC唔行6V行7.4V嚟行快小小，但唔會話因為你行邊一個MODE佢就會快咗。

所謂嘅MODE行快咗，係講緊佢地反應速度。正常嚟講，為咗互通性，所以每一間廠行嘅SERVO，我講緊DIGITAL，都有一個處理器嘅速度。情況就好似買電腦嘅RAM咁，為咗互通性，大家都係呢個SPEC下都係行果個Hz，大家都係DDR5就大家都係行5600Mhz。而一般而言，DIGITAL SERVO行嘅，都係333Hz。但有一啲廠為咗令啲SERVO可以反應速度更加快，所以就會出一啲特別嘅MODE出嚟，例如FUTABA嘅SR，SANWA嘅SSR等。呢啲MODE簡單嚟講就係加快咗處理速度頻率，令到隻SERVO反應速度更加快。舉例FUTABA嘅SR就行到去833hz，Sanwa就係384hz。加快嘅頻率，自然可以令到個SERVO每秒處理由發射出嚟嘅訊號更多，咁好自然地佢對你發射俾嘅所需反應會做得更加多，從而做成佢嘅反應會更加所謂"跟手"，你扭軚時俾嘅指令SERVO可以快啲CATCH UP到然後做下一個動作。但係，佢SERVO嘅速度都係咁多，0.06秒/60度係唔會改變，只係佢處理你指令快咗，舉例你扭完左軚即扭右軚果下，由收到指令到SERVO做同一個動作時，果一下快咗。

除咗頻率之外，每間廠都係會係頻率之外改變佢個指令程式包裝。正如我玩先所講，由於為咗每一間廠嘅SERVO，大家都可以互通，其實佢地對個動作基本指令，都會有一個包裝方式。等如大家都係ANDROID機，個寫PROGRAM方法大家自然都係一樣，嚟等佢係每一部機都行到。但係咁樣做法，問題就係個基本指令方法未必係最快最有效。所以有啲廠就會發展自己嘅編程方法，就好似SANWA嘅SSR/SUR或KOPRO嘅HCS。佢呢啲MODE，只係係可以係控係同一品牌，接收SERVO都係同品牌下，咁先可以行到，因為佢地個動作編碼方式唔同咗，就算舉例你SANWA你係行384hz，你隻SERVO冇SANWA呢個編碼嘅解碼，一樣係行唔到快。同埋每間廠都希望大家用返佢地自家MODE嘅，咁好自然你唔會見到FUTABA可以支援到SANWA或KOPRO嘅編碼指令。所以就算你話可以用到同一個頻率，用到自家編碼同用唔到自家編碼，係反應速度又或者可以係控同SERVO/電變之間嘅溝通快慢都會有分別。亦都係即係話，舉例FLYSKY就算用到FUTABA嘅SR，都只係個處理頻率快咗，但冇得做SERVO SETTING或做一啲更細緻反應調整。呢個亦都係點解當用到啲特別MODE時，SANWA同KOPRO都唔係插返落CH1/2到，係到插落個S.BUS果到嘅原因。

至於可唔可以話，我隻SERVO明明行333hz，我改佢行400hz得唔得。理論上，冇話唔得，但係每一個牌子SERVO，佢本身個預算你行嘅頻率係有定，有佢地概定嘅速度體質，你夾硬谷佢行快啲，同你電腦超頻一樣，體質唔好第一就會過熱，然後就係因為你行超過佢可以負荷，就好快HANG機或會打冷震。重則可以燒咗佢都得。所以每間廠都寫明，如果你隻SERVO本來唔係行果個MODE，你夾硬咁用，係會燒就係咁解。要行到果個MODE就應該要買返一隻可以做到嘅。市場上唔係冇SERVO可以行到好高頻，舉例THETA係行到晒SANWA/FUTABA嘅頻率。但都係果句，頻率只係反應其中一環，仲要睇埋個CODING編碼。頻率快咗係可以增加咗一啲反應手感，但係冇CODING配合，其實都係行唔盡個反應。

當然反應仲有好多細節嘢，舉例SANWA有SSL，FUTABA SR仲有細緻編程，又或者KOPRO EX-NEXT 4S。暫時計未有人可以做到互通晒，始終每間公司都希望自家技術唔外流，又或者有版權專利等保護，因為大家都係鬥緊速度。都係果句，一分錢一分貨嘅道理。

[Youtube]GXovCm56uoQ[/Youtube]

作者: AMAT 時間: 2022-2-15 10:32
講多少少，如果大家仲係唔明咩係SR，SSR，係咪同接收有關，我會用以下嘅表列嚟講解。

遙控品牌	傳送協議制式(發射與接收)	特別頻道制式 (接收至SERVO)	自家傳送特別Coding	額外編程制式
Futaba	F4G, S-FHSS, T-FHSS SR, FASST	SR(833hz)	S.Bus2	SR, S.Bus2
Sanwa	FH4, FH5	SXR, SSR, SUR(384hz)	SXR, SSR, SUR	SSL
KOPropo	XT	HCS(可調)	HCS	4S, ICS
Flysky	AFHDS2A, AFHDS3	SR(833hz), SFR(1000hz)	無	無

點樣先知果款控或SERVO係咪要用特別CODING，最基本係睇佢插邊個位。
如果佢係插落普通CH1/2咁用，咁佢係冇特別CODING。
如果佢係要插落個SBUS到，就係要用特別CODING。

以上圖表係解釋每一個名稱嘅分布，唔等如果個傳送制式可以行到果啲特別頻道。
舉例FUTABA SR MODE係T-FHSS SR同F4G先行到。FLYSKY嘅SR亦都要AFHDS3加最新款接收先行到。

作者: masterlai 時間: 2022-2-15 10:43
之前玩直升機，有的尾舵機為了追求極致響應速度，採用窄頻的方式。
將解析度中立點降至760us (範圍550-950)
增加訊號更新速率、降解析度(標準是1100-1900)
只要一般波寬一半的時間就可以傳遞訊號完成...

目前的窄頻servo似乎都是給heli的陀螺儀用的，
不知是否有可調波寬的槍控可以支援?

作者: AMAT 時間: 2022-2-15 13:03

masterlai 發表於 2022-2-15 10:43
之前玩直升機，有的尾舵機為了追求極致響應速度，採用窄頻的方式。
將解析度中立點降至760us (範圍550-9 ...

應該沒有。
你那個是透過降低解釋度進行。
車反而是需要高解釋度。那些SR,SSR都是以高解釋度去進行。

有但有些品牌是會採用減少頻道傳送去加快傳送速度。
舉例FLYSKY的高速MODE是採取了將4CH降成2CH完成。
SANWA的都有類似的情況。

減少CH變成每一節傳送的東西少了，沒有多餘的空框訊號，速度會快啲。

歡迎光臨 RC EVOLUTION - 遙控工房 - 香港RC遙控車討論區 (https://www.rc-evo.com/xbbs/)